Woh Din

(On the occasion of my graduation farewell, I wrote this poem with whole heartfelt feelings and emotions.. Dedicated to all my dear friends and the lovely days I spent with them.. )

Mehfil-mehfil gaaenge, sabko yeh geet sunaenge..
Aaj dil dooba hai kuch yaadon mein, aansoon se aate hain in do aankhon mein...

Beete woh saare pal aise, ke chand lamhon mein yug beeta ho jaise..
Kuch kisse hasne-rulaane ke, woh kisse baatein banane ke..

Koi Guna se koi Sagar se, koi Rewa se koi Gwalior se,
Sang Bhopaliyon ke tum bhi sun lo baatein un dino ki, muh zabaani is Indori se..

Kabhi daste, kabhi haste, kabhi paani sang holi machate, 
kabhi kisi ko puchkar toh kisi ki dhulaai, har baar humne badi hadd hai machai.. 

Yaad aaenge woh tiffin mujhe, jinke dum yeh zindagi kati hai meri..
Jinke dum kategi aage zindagi meri, yaad aaenge woh suhaane din mujhe...

Beet gaye yeh 4 saal, Bhopal ke kone kapate chhaan maarne mein..
Kabhi kisi dam ke kinaare pe, toh kabhi New-market/DB/10 number ke galiyaron mein..

Mudkar dekha jab is beete kisse ko, toh mili taarikh 13 October rakhi sirhane ko..
Kehne ko din tha woh college ka pehla, main kehta hoon, din tha woh nayi yaadein jutaane ka pehla..

Woh Dark Room ke jhilmilate rang, woh field mein masti yaaron ke sang..
Chooste-thookte beet gaye titration,  Samajhe hum kaise hota hai lubrication..

Dhoondhli hain par meethi hain,  MCA block ki yaadein bhi badi suhaani hain...
Kursiyon pe ho gol ghumna, yaa peeche baith dumsharaz khelna..

Woh din terrace pe bunk lagane ke, woh din ragging aur khauf khaane ke..
Woh foondroo humari yaari ke naam, woh thudda un dino ke naam..

Mood-I ho yaa Bhojpur ho, naam jagah ka jo bhi ho..
Jab dhun jami hai apni, toh jaise saare sur sargam mein gaane lagein ho..

Maana har pal saath naa the, fir bhi har pal saath hi the..
Gam ho yaa khushi, dhamaal ho yaa tension, arey hum sab saath hi toh the..

Woh night-outs, woh long-drives, Woh B'day bashes,
Woh hazaron due treats, woh shartein, woh udhaari, woh kash, woh crushes..

Woh teri, woh meri, yeh tera, yeh mera, yeh apna, yeh uska
the tum, the hum, thi adaaein, thi nishaaniyan, hain khushiyan, hain ruswaaiyaan..

Rahenge hum, rahoge tum, rahengi yaadein humari,
Roenge hum, ro-oge tum, yaadein jab sataaengi humein tumhari aur tumhe humari..

Aaj jab sab kissa khatam hone ko hai, jab koi humein bhulaane ko hai..
Kehta hoon us bejaan beraham bedil se, ke Ae yaar, asar abhi meri yaari ka hone ko hai...

Socha tumne ke yahin chhod jaoge humein, sapno ka, khwahishon ka vaasta dekar bhul jaoge humein,
Bhool kar gaye bhool se is lambe safar mein akele chalne ka sochkar, chal diye jo aaj tum humein yahan akela chhodkar...

Mehfil-mehfil gaaenge, sabko yeh geet sunaenge,
Tumhare dil mein humari yaadein chhod jaenge, waada hai hum bhi un aankhon ko kuch aansoo de jaenge..